Pag-uugit, Pagsusulit sa tiwala ng tao at biyaya ng langit

Tatlong taon ng masigasig na paglilingkod ni kapitan Jolan Aralar, dagdag sa kinagisnang proyekto ng kanal, pathway at poso.  Nakatuon sa pagpapasigla ng programa sa health, education, economic, culture and sports. Higit sa lahat, social infrastructure.

Naka- sentro sa mga tao.  Pangangailangan nila ang tinutugunan. Sila ang kinukunsulta sa problema. Pamunuang Barangay ang naglalapat ng solusyon, kundi man humahanap ng katapat nito sa municipal, provincial at national governments. Pati na sa NGOs, kaibigan at kabarangay dito at sa ibang bansa.

Tamang pamamaraan, masistemang pakikipag-ugnayan, mabungang koneksiyon ang daluyan.

INNOVATIONS

Barangay ID ng Calumpang

Pruweba ng tirahan na may numero ng election precint ng may-ari. Pagkakakilanlan na tinatanggap sa banko. COMELEC at mga institusyon ng gobyerno. Mas mababa ang halaga kaysa ibang ID ng pamahalaan.  Kailangan para sa transakyon sa barangay, o sa referrals sa financial at medical assistance mula sa munisipyo.

Calumpang ang unang barangay na me-ID ang residente. Hindi lang nakapagpataas ng locally generated income ang ID kundi ng “tulong mo sa Calumpang mong Hirang na  naglilingkod sa iyo”.

Tools for Transparency and Building Linkages

Mula December 2008, apat na isyu ng community newspaper, d2 sa Calumpang, ang nalathala. Dito itinampok ang mga proyekto at programa ng barangay kabilang ang kita at gastusin ng barangay. Tanging Calumpang lang, sa 40 barangay ng Binangonan, ang may sariling dyaryo.

May blog, d2sacalumpang.wordpress.com na higit 22,200 ang visitors mula December 2008 hanggang September 30, 2010. Naka-link sa Wikipedia. Source ng information sa many subjects under the sun hindi lang sa barangay kundi sa buong mundo man.

May facebook account, Calumpang Kong Hirang, social networking site na ginagamit hindi lamang upang pataasin ang kaalaman ng publiko sa kaganapan sa barangay. Ito rin ang nag-uugnay sa mga kabarangay na nasa abroad. May informal organization, Taga Calumpang Din Po Kami, na kinabibilangan ng kabarangay sa ibang bansa.

Kita Kits sa Flag Ceremony

Isang innovation ang monthly Flag Ceremony sa basketball court upang makonsulta ang mga samahang kapitbahayan, mabigyan ng tamang inpormasyon at maipadama na sila ay mahalagag bahagi ng pamamahala ng barangay. Ginagamit din ang okasyon bilang “feedback mechanism” sa mga programa at patakarang ipinatutupad ng barangay.

Samahang Kapitbahayan

Ang lakas ng gobyerno ay mula sa lakas ng samahang kapitbahayan. Samahan ang pinakamabisang paraan ng paglalapit ng gobyerno sa tao at pakikibahagi ng tao sa gobyerno.

Mula sa halos wala, 34 na samahang kapitbahayan ang nabuo nitong tatlong taon. Samahan ang kumikilos para sa nagangailangan sa kanilang sitio – taga-request ng proyekto, taga-monitor ng kapayapaan at kalinisan, taga-hatid impormasyon ng Sangguniang Barangay.

Ang mga pangulo ng samahan ay bumuo ng grupong MAGDIWANG at pinatatag ng leadership training sa pakikibahagi sa Sanggunian. Miyembro sila ng Expanded Barangay Council sa pagbabalangkas ng programa. Kabilang sa Barangay Peace and Order Council, Barangay Patrol Action Team, Barangay Disaster Coordinating Council. Bahagi ng Barangay Solid Waste Management Council. Kasali sa mga proyekto tulad ng Lakambini ng Calumpang. Komite de Festejos, arcs contest, pabasa, fund raising bingo social.

Lakambini ng Calumpang

Sa tatlong taon ng Lakambini, lalong kuminang ang patimpalak na tumutuklas ng kagandahan at katalinuhan ng mga dilag ng Calumpang.

Isang “governance innovation” ang cultural activity na ito. Nagpapatatag sa mga samahang kabitbahayan, nagbibigay pagkakataon sa mga taga-Calumpang at kabataan na lumahok sa gawaing nagpapaunlad ng mga komunidad at nagpapayabong sa kabuhayan ng barangay.

Mga samahan ang naglilikom ng maraming recyclable bote, plastic, dyaryo, karton para sa Lakambini ng Kalikasan. Mga samahan ang nangangampanya sa mas maraming mamamayang kumuha ng Barangay ID at sedula para sa Lakambini ng Kabuhayan. Samahan din ang naghahakot ng maraming manonood na may entrance fee sa coronation night para sa Most Popular. Kaya’t ang premyo ng nanalo ay sa mga samahan ibinahagi.

May pamanang cemented road sa ASAC, “the road that a crown built” si Lakambini 2008 Trixie Ann Santos. Runners-up, Glaiza Gumayao at Neldine Benico ay may Street Marker sa Alcantara at Kubol naman sa Laspag.

Dala ni Lakambini 2009 Justine Joy Esguerra ang pailaw sa Sysna. Sa Runner- up Yui Gutierrez galing ang Street Marker sa Neighborhood, habang itinuloy naman ni Pauline May Santos ang pasimento ng ASAC road.

Lakambini 2010 Kate Tolentino ang magbibigay puhunang pangkabuhayan sa samahan ng Cableway habang runners-up Rhobie Ann Mesa at Rachel Sarmiento ay may pagawain sa Bayakan at ASAC.

Nagdagdag ng titulo ang mga Lakambini. Nanalo si Trixie Ann Santos ng Ms. STI, Ms. Taytay, sa contests ng Generation East Model Search at Bella Look-A-Like. Full scholar din siya ng STI College. Si Glaiza Gumayao ay Ms. AMA Computer Learning Center, Ms. Silka Papaya at gumanap na artista sa indie film. Si Yui Gutierrez ang tinanghal na first runner-up ng Danz Showdown, Search for Sex Bomb Dancers.

PROBLEMA AT SOLUSYON

Informed Choice: tugon sa lumolobong populasyon

Naghahain ng dalawang family planning menu: Responsible Parenthood Movement at Reproductive Health Program. May mapagpipilian na angkop sa paniniwala ng mag-asawa, kaya ng bulsa at komportable sa may katawan.

Sa pakikipagtulungan ng Rizal Provincial Health Office, sampung RPM seminars ang dinala sa sulok-sulok ng barangay nitong 2009 at 2010. Mahigit 500 couples ang naturuan ng natural family planning – thermometer and beads – methods. May “pang-akit” na libreng Jollibee meals at transportation allowance sa sumaling mag-asawa.

Contraceptive pills, condoms, IUDs, injectables- ang ipinalalaganap sa forums on artificial birth control methods ng DKT Philippines. Ginanap apat na beses sa mga sitio na malaki ang bilang ng mahihirap at batang mag-asawa.

May 200 couples ang nabigyan ng samples.

May Pop Shop sa barangay para sa population commodities na branded (para sa paying clients) at mayroon ding subsidized commodities mula sa United Nations Population Fund at DKT Phils. para sa poorest of the poor.

Tulong sa Informal Settlers: Programa sa Palupa

“Dayuhan” ang turing sa kanila ng ilang kabarangay dahil sila’y migrants sa Calumpang. Mula isa hanggang sampung taon na silang nakiki-tira sa lupang hindi kanila at kadalasan  sila’y nabibilang sa indigent families.  Mayroon namang pamilyang may kakayanang bumili ng lupa at nais mag-ambag sa inaari nilang barangay.

Ang suliranin ng may 500 informal settlers sa Lorecom, Reyes Compound, Picones Compound, Hinayon Looban, Hinayon Extension at Saperia Looban ay pinapagaan ng  pakiki-pamagitan ng gobyerno sa mga may-ari ng lupa at sa mga naninirahan duon.  May pag-uusap para sa  kasunduang maayos at abot kayang pagbili ng lote.  Nakikipag-ugnayan ang barangay sa Rizal Provincial Housing Committee para sa Direct Buying Scheme at Community Mortgage Program (CMP).

Sa Cableway Looban, ang bangkong may-ari ng lupang tirahan ng mahigit 40 pamilya,  ay bukas sa CMP. Sa ilalim nito, bibilhin ng pamahalaan ang lupa sa may-ari at pahuhulugan sa mababang halaga at mahabang panahon sa komunidad dito. Tinutulugan ng Sanggunian ang Samahang Kapitbahayan para sa kailangang dokumentasyon at representasyon.

Naghatid impormasyon ang pamunuan ng Rizal Provincial Housing Committee sa Barangay para sa programang Direct Buying at Community Mortgage Program.

Tugon sa kawalan ng hanapbuhay

May Memorandum of Agreement ang Calumpang sa Technical Education and Skills Development Authority para sa kurso tulad ng baking, dress making, automotive, welding, computer hardware services, at massage therapy. Nitong 2010, 26 na kabarangay ang nagtapos sa TESDA.

Magbubukas ng kursong welding para sa mga kabataan na dito sa barangay gaganapin  at TESDA ang magtuturo at magpapahiram ng kasangkapan. May pondong ilalaan sa pagbili ng welding machines at kagamitang pangkasanayan.

Calumpang ang unang barangay na nagdaos ng Job Fair kung saan 42 sa 105 na applicants ang nagka-trabaho.  Dagdag dito ang 32 na job orders dulot ng pagpasok ng mga contactors ng Manila Water Corporation. Ang Barangay-based Job Generation through government infrastructure ay nagbigay trabaho sa mahigit  60 taga- Calumpang na karamihan ay indigents.  Sa referral ni Kap. Jolan, anim  ang napasok sa pribadong kompanya na kabarangay din ang nag-ugnay.

Bantay Inday Program: Tugon sa pagbabawas ng kahirapan

Minomonitor ng Pamunuan ang kalagayan ng marginalized sector at sa kanila itinututok ang programa sa kalusugan at nutrisyon, gayon din ang tulong pangkabuhayan at job generation project. Layong nitong maitaas ang antas ng buhay ng 400 pamilyang indigents.

May Tindahan Natin, bilihan ng murang NFA rice at prioridad dito ang mga inday. Sa maliit na pautang na limang daang piso, may puhunan ang ilang inday sa pagtitinda ng tinapa, turon, balot, basahan. Puhunang hindi na ibinabalik pa, kundi para huwag na lang ipanghingi ang kakainin sa araw-araw.

Pangangailangang Pangkalusugan

May murang gamot sa Botika ng Barangay duon harapan ng Barangay Hall. Plano pang maglagay ng Botika sa lugar ng Saperia at Hi-way kung kaya’t nag-training ng Barangay Health Workers na mag-aasikaso nito.

Patuloy ang programang pangkalusugan at nutrisyon. Nandiyan ang regular na bakuna,  food supplementation at operation timbang para sa mga bata. May bone testing,  reflexology, at cataract operation para sa Senior Citizens. May pagkalinga sa kabarangay na may kapansanang allergy sa balat, hika at ubo,  sponsor ng Allerta. Kaagapay ng Community Relations Projects ng Philippine Air Force, tatlong  medical and dental missions ang isinagawa na nasilbihan ang 1,489 patients.

Hindi nauubos ang dugo ng taga-Calumpang kahit pa tatlong beses isang taon mag-blood letting. Todo alay-dugo kaya nakamit ng Calumpang ang first prize  nong 2009 birthday ni Mayor Boyet, premyo’y motorcycle. Third prize nitong 2010 birthday ni Governor Jun Ynares III, premyong limang kabang bigas. Higit sa lahat, mahigit 215 Red Cross cards na katumbas ng 215 pandugtong-buhay.

Akala ni Jojo Antazo ay wala ng pag-asa ang anak niyang may kapansanan sa paa. Sa “connect ” ni Kap. Jolan sa Mabuhay Deseret Foundation, na-cast ang paa ng anak ni Jojo at may leg therapy na aasahan. Ginagamot din ang anak ni Vicente Villarina Jr.

Suliranin sa Boundary ng Barangay

May lugar na sakop ng Calumpang sa Cadastral Map subalit ang mga residente ay nakatala sa karatig barangay. Suliranin din ang botatanteng nakalista sa ibang barangay na kumukuha ng serbisyong laan para sa taga-Calumpang. May mga reklamo din na dapat ay pagharapan sa BT ng Calumpang subalit sa kanugnog barangay iniluluhog.

Nitong Census 2010 ng National Stataistics Office, sa pagtutok ni Kap Jolan at sipag ng mga guro at BHW na census enumerators,  naibalik sa Calumpang ang pamayanan na dati ay nawala sa listahan nito: sa Cadiente Compound tabi ng Darangan; sa Everlasting Street tabi ng San Juan; sa Anonas St. tabi ng Muslim Mosque; sa Cattleya Street, tabi ng Libis; at Cortez extension, dulo ng Ynares II Street. Sa pagtaas ng bilang ng residente, may kaukulang pagtaas ng IRA natin.

ANI NG TAMANG PAGHAHANDA

Masigasig sa pag-request at masistemang pag-follow-up nito kung kaya’t ang Calumpang ay may bagong garbage truck mula kay Gov. Jun Ynares,  dalawang patrol tricycle  mula kay Congressman Jack Duavit, dalawang bisikleta at gamit panglinis-basura mula kay Bayani Fernando.

Ang basketball court sa Cableway Road na mahigit 10 taong hindi nabubungan, sa maayos na paghahanap ni Kap Jolan ang mga kasama ng  katibayan ng pagmamay-ari ng lupa,  ay naging Ynares Multi-Purpose Covered Court. Salamat kay  Gov. Casimiro Ynares, Sr. na siyang nagtimbang pabor sa lugar ng court batay sa kahiligan ng mahigit 2,000 mamamayan at makulay na kasaysayan nito bilang “the basketball court of  affections” para sa henerasyon ng manlalaro mula nuong 1965.

Mistulang si Curacha ang court sa walang tigil na kaganapan dito. Bukod sa mga palaro, meeting, sayawan, binguhan, medical missions, Lakambini ng Calumpang, ito rin ang venue ng product testing ng Oreo, at Ponds. Dito nag-dance showdown ang mga kalahok ng Sex Bomb 2010.

Upang masilbihan ang manlalaro pati na manonood, nagpatayo ng public toilet at bathroom sa tabi ng Covered Court. Para mapanatili ang kalinisan sa court at ng  walang magbabawas sa paligid nito. May kaunting bayad ang paggamit nito para mamintina ang tubig, sabon at kaayusan ng pasilidad.

Mga Datos sa Kompyuter

Impormasyong kinalap at inilagay sa isang computer program. Actual inhabitants ng Calumpang, listahan ng registered sa COMELEC, survey ng Barangay Health Workers ng transients at bagong lipat sa barangay, talaan ng indigents, batang malnourished, matatandang maysakit, ulat ng Samahang Kapitbahayan sa informal settlers.

Sa oras ng pangangailangan ay madaling makuha ang impormasyon. Bentahe nito ang pagkapili sa Calumpang bilang beneficiary ng dalawang feeding programs.

Mula sa Feeding Program ni Mayor Boyet Ynares, 50 batang mahirap ang binigyan ng tamang nutrisyon sa loob ng anim na buwan. Ang dating underweight at malnourished ay nagkaroon ng sapat na timbang at lumakas ang resistensiya ng katawan.

Mula naman sa United Nations World Food Program, ang mga batang edad 6-23 buwan, mahirap man o may kaya, ay nabigyan ng anim na buwang supply ng soya, gatas at mantika. Ang Supplemental Feeding na ito ay nakapag-pataas ng timbang ng mga beneficiaries na regular na minonitor ng Barangay Health Workers.

PROGRAMA AT PROYEKTO

Educational Program

Bukod sa tulong sa tuition fees at kagamitang pang-iskwela ng kabarangay sa high school at elementary sa nakaraang tatlong taon, may cash gifts din na ibinibigay sa mga honor graduates ng Calumpang Elementary School.

Sports Development

Regular ang paliga ng Captain’s Cup, ng SK Cup at pati palaro para sa 40-years-old and above, Open-Age at Invitational basketball. May suporta ang barangay sa tatlong grupong nagtataguyod ng sports activities.

Development, hindi lang sa basketball, softball at volleyball, kundi pati table tennis at taekwando. Labing apat na kabataan ang sumailalim sa Milo Best Training Programs levels one to four.

Cultural Programs

Patuloy ang suporta ng barangay sa taunang selebrasyon ng Kapistahan  ni Santa Ursula, Pabasa sa Mahal na Araw at Santacruzan sa Mayo sa pagbibigay ng assistance sa pitong samahang nagtataguyod dito.

Bagong programang pangkultura ang inilunsad ng Sanggunian: Lakambini ng Calumpang, Photo Exhibit, at Huntahan sa Kasaysayan.

Ang Photo Exhibit, nagtatapok sa Basketball Court of our affections, Barangay Official then and now, google ang interpretative maps, Pritil ng ating pangarap  Lakambini ng Calumpang, arts, artists and institutions.

“Blockbuster” ang tatlong beses na palabas  nitong 2008-2010. Parang History of Calumpang capsulized in eight-panels. Bahagi ng balik-tanaw sa makulay na lumipas at sulyap sa minimithing hinaharap.

May Huntahan sa Kasaysayan

Kwentuhan ng may kaalamang matatanda at mapagtanong na bata  upang talakayin ang  kasaysayan ng barangay. Sinimulan sa Alamat ng Basketbolan sa Calumpang, huntahan sa court ng mga manlalaro at usapang “the glory days of basketball”, paghahanap-paraan para maibalik iyon muli ng kabataang basketbolista.

BARANGAY ORDINANCES

Ipinatupad ang ordinasang nagtataas ng halaga ng  barangay clearance for business ayon  sa klase at laki ng negosyo at nagdagdag kita sa barangay. Nataas ang permit ng bangko, private schools, hardware and construction supplies kesa ibang tindahan. Kinunsulta ang mga negosyante na una ay tumutol ngunit sa pangako  ng serbisyong hakot- basura at tanod-ronda ay tumaya din ang business community sa barangay.

Ipinasa ang Barangay Solid Waste Management Ordinance upang mabawasan ang basura sa pamamagitan ng paghihiwalay (segregate) nito upang ma-recycle, ma-reuse o magawang compost. May multa sa hindi maayos na pagtatapon ng basura. May pagtatakda ng araw at oras ng paglalabas at pagkolekta ng basura sa mga sitio.

Nasa pag-aaral naman ang Ordinansa sa Pangingisda na nagtataya ng  territorial boundaries na sakop ng barangay sa Lawa ng Laguna, pagbibigay karapatan ng  hanapbuhay sa Samahang Mangingisada at pagbabawal ng mga pamamamaraan ng pangingisda na nakakapinsala sa lawa.

Inilalatag naman ang Ordinansa sa Responsableng Pag-aalaga ng Aso. Layong mahikayat ang mamamayan na magparehistro ng alagang aso, maglagay ng tag na may number at pangalan nito at regular na magpabakuna ng anti-rabies dito. Huhulihin ang asong gumagala at nagdudumi sa paligid, hahanapan ng kulugan o tali para sa alaga,  Kilos laban sa pagkalat ng rabies at stray dogs.

PAGTATAAS NG ANTAS NG PAGLILINGKOD

Maayos na Tanggapan

Bagong hilamos, bagong bihis at bagong make-up pa ang Barangay Hall. Pininturahan, kinurtinahan, dinibisyunan ng glass walls para may air condition ang opisina.

De-uniporme at may ID ang barangay staff. May pagsasanay sa dagdag na paglilingkod ang Barangay Health Workers. May personnel improvement program ang nasa opisina. Kumpleto sa gamit at suporta ang Barangay Clean & Green Brigade.

Pinalakas na Barangay Tanod para sa misyong mangalaga ng kaayusan at kapayapaan ng barangay. May sariling himpilan ang 22 BT na 24/7 duty. May suportang pagkain ang dawalang shiftings ng tanod. May uniform iba-ibang kulay sa isang lingo, may two- way- radios, batuta, handcups, bota at raincoats.

Mobile ang BT dahil may patrol tricycles at bicycles. Nagsasagawa ng foot patrol kada gabi. May trainings sa ilalim ng Crime Watch Force. At dahil si Hepe Joel Idioma ay opisyal ng CWF, nahihila ang mga kasapi na magtanod din kung kailangan.

Maglalaan ng bagong computer at program ang BT upang ma-database ang records ng mga kaso sa barangay para sa madaling pagkuha ng kaila-ngang impormasyon.

Malalim na karanasan at karunungan ang dala ng  Lupong  Tagapamayapa. Ang Chief Lupon Pastor Ramos ay retired policeman na dalubhasa sa pag-iimbistiga.

Graduate ng Bachelor of Law si Salvador Abrogar habang Licensed Criminologist naman ang natapos ni Ruben Estrelles.  Kasama ang ilan pang elders, sila ang dumidinig ng mga reklamo sa barangay.

Naglalayong  magkaroon ng amicable settlement sa mga kaso upang maiwasan ang gastos at abala ng magkabilang panig kung iaakyat pa sa Municipal o Regional Trial Court.

Pagbangon sa Kalamidad

Namuksa man ang bagyong Ondoy at Pepeng, may mga kamay na tumulong at nahawakan ang 649 pamilyang biktima. May tulong mula gobyernong barangay, municipal, provincial at national, pati na private sectors tulad ng ABS-CBN Foundation at Ateno Family.

May assistance mula Japan, Korea, USA, Australia, Europe. Ang Friends Indeed USA, Inc., sa pangunguna ni Ms. Nena Kaufman ay isa sa NGOs na koneksyon ni Kapitan Jolan sa kanyang pinangalingang pwesto sa League of Municipalities at United Nations Population Fund.

Ondoy Beneficiaries

  • 76 Pamilya mula sa mga evacuation centers- Relief goods  ng AAR Japan, kinatawan ni Mr. Go Igarashi.
  • 17 Pamilya mula Sitio Matikiw- Cons-truction materials (P25,000.00) mula Asian  Social Institute.
  • 42 Pamilya – Construction materials (P7,000.00) mula International Organization for Migration (IOM) European Community.
  • 4 na Tao- Livelihood Assistance (P15,000.00) mula sa IOM.
  • 27 Pamilya – Emergency Shelter Assistance (P2,000.00) mula kay Mayor Boyet Ynares.
  • Samahan sa Gervacy – Livelihood Assistance (P35,000.00) mula sa Oxfam (Oxford Committee for Famine Relief)
  • Financial Assistance mula kina Governor Casimiro Ynares III at Congressman Jack Duavit.

Senior Citizens

Senior Citizens na walang kupas sa pagdalo ng Flag Ceremony sa Munisipyo kada Lunes at sa Calumpang covered court kada ikalawang Martes ng buwan.

Sa pamumuno ni Pangulong Presentacion Lopez, ang bagong pamunuan ng Senior Citizens ay mandi’y  ayaw paawat sa pakiki-bahagi sa gawaing-barangay. Sila na bagama’t may hindi napagkakasunduan bilang mga indibiduwal, ay hindi naman idinadamay ang kanilang samahan.

Tunay na may matututunan ang mga namumuno na hindi pa seniors sa mga matatandang ito.

Business Partnerships

Dahil maliit ang Barangay Hall, nagkaroon ng kasunduan ang Sanggunian at ang  1489 Cableway Resort na ang mga pulong ng SBC ay duon gagawin sa pavilion o kaya’y fuction area ng resort.

Ang paggamit ay walang katungkulang-pinansiyal sa bahagi ng pamahalaang lokal.  Ito  ang paraan ng pribadong korporasyon upang mag-“give back” sa community.

Dahil din sa pilosopiyang “giving back” kaya madaling napasunod ang mga negosyante ng Calumpang sa ordinansang nagtataas ng halaga ng barangay clearance for business at iba pang sertipikasyon.

Pang-tapat ng Barangay sa partners: pangangalaga ng “environment conducive to business growth”.

Tamang Values sa Batang Manlalaro

Karaniwan sa paligang pangkabataan ang malaking gastusan sa uniporme ng team. Hindi lang dahil may paligsahan ng best uniform kundi pati ang  pabonggahan ng mga kasali.  Kung kaya’t para hindi mag-mukhang kawawa, ang mga batang manlalaro ay bahay-bahay nanghihingi ng solicit. Umaakyat pa nga sa pampasaherong sasakyan para humingi ng “kahit barya lang”.

Nitong 2010 Captain’s Cup at SK Cup, nasimulan ang simpleng uniporme para sa lahat ng team at sinagutan ng SK at SBC ang gastusin dito. Sa ganitong paraan naipamulat sa mga batang manlalaro ang basic intention ng palaro bilang sports at libangan. Hindi pabonggahan, hindi rin panghihingi upang matustusan ang bongga.

Kita at Gastusin ng Barangay

Maganda ang takbo ng locally generated income ng Barangay- bayad sa business at construction permits, Barangay IDs, certifications at clearances. Kabilang dito ang percentage mula sa Municipal Collections sa cedula at Real Property Tax.

Ang lumaking Internal revenue Allotment ng Calumpang ay gastusin naman sa personnel services, operating expenses, capital outlay,  pagawaing barangay, Sangguniang Kabataan at Senior Citizens.

Re-painting of Brgy. Hall, improvement and air-conditioning of offices.

Multi-Cab overhaul & re-painting.

Ang kita ay itinutustos bilang assistance  sa financial, medical, educational, at burial na pangangailangan ng sector ng mahihirap.

Pagawaing Barangay


Pag-uulat ng Sanggunian Barangay sa pamamayan tuwing anim na buwan

Gamit ng BT mula kay Cong. Joel Duavit.

Mumunting Tagumpay

•  Bantay Inday Program – Semi-finalist ng Galing Pook Award on Good Governance 2008

•  Barangay Calumpang – Finalist for Best Performing Barangay in Rizal Province 2008

•  Most Active Barangay in Blood Donation ng Red Cross  2010

4 thoughts on “Pag-uugit, Pagsusulit sa tiwala ng tao at biyaya ng langit

  1. Nang muli kong balikan, basahin, at namnamin, ang mga naganap sa barangay noong 2007-2010, ako ay napangiti, nasiyahan, dahil naging bahagi ako tayo ng makabuluhang mga pagbabago sa ating barangay. looking back, parang ang hirap ng ulitin. although it takes political will to implement things that are seemingly unpopular, ang nakakaligtaan ng iba..ang mga programa sa Calumpang kong Hirang ay nagdaan sa proseso na ang mga tao ay bahagi ng pag identify ng problema, paghahain ng solusyon, pagpapatupad ng mga aksyong napagkasunduan, at ebalwasyon kung ang mga nagawa ay tumpak at tumutugon batay sa inilatag na mga layunin ng proyekto. i would recommend that other LGUs take a look at CKH’s three-year governance trek.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s